Thy Womb

Ang galing... isa na naman pong makabuluhang pelikula ang nilikha ng mga magagaling nating derektor, isang pelikulang hindi mo naisip na maaari palang gawin, Salamat, yan ang aking unang bati sa mga taong gumawa ng pelikulang ito, lubus at taos puso ang aking pasasalamat sa lahat ng taong nasa likod ng pelikulang Thy Womb, sa wakas napanood ko na rin ang pelikulang gumawa ng ingay sa mundo ng Indie Film (Although hindi ako sure kung indi film nga ba ito o partly indie film lang) binigyan ng ibat-ibang parangal at 5 minutes standing ovation sa ibang bansa at maging sa sinehan sa SM North, matapos naming panoorin naghiyawan ang mga tao at nagsipalakpakan dahil sa sobrang paghanga nila(namin) sa pelikula,  ito ay isang kwento na hinugot mula sa kultura ng mga Muslim sa Tawi-Tawi (The Southernmost frontier) na kung tawagin natin ay Badjao, isang kultura na puno ng kritisismo, isang probisya na malayo at halos di na naririnig ng gobyerno, isang kwento na magbibigay liwanag sa isang madilim na pagkakakilala natin sa kanila.

Ibang-iba ito sa inaasahan kong takbo ng pelikula, dahil hindi ito tungkol sa kung gaano kakumplikado ang mga kaguluhan sa Mindanao bagkos ito ay isang kwento tungkul kay Shalelah isang Badjao o Siamal at ng kanyang inaalagaang pamilya, isang kwento tungkul sa payak na pamumuhay ng mga badjao, tungkul ito sa makulay na kultura ng mga kapatid nating namumuhay ng payapa malayo sa kinagisnan natin, at kung papaano nila naitatawid ang kanilang pang araw-araw na pamumuhay.

Kung ang hinahanap niyo ay isang pelikulang magbibigay sa inyo ng excitement, mananakot, gugulatin kayo o di kaya naman ay magbibigay saya at ngiti sa inyo, pangungunahan ko na kayo, hindi para sa inyo ang pelkulang ito, pero kung ang hanap niyo ay isang pelikulang kapupulutan niyo ng aral at siyang magbubukas ng inyong isipan, isa na siguro ito sa mga pelikulang masasabi kong dapat nating alagaan at mahalin.

Bilang isang Muslim, natutuwa akong ipakilala sa inyo ang aking kultura sa pamamagitan ng pelikulang ito, payak at simple lang ang pagkakagawa, mabagal ang bawat eksena na siyang naging dahilan upang mabilis mong maintindihan ang gustong ipahiwatig ng derektor, tahimik at wala masyadong sound effect liban sa mga alon at tinig ng karagatan, mahinahon ang bawat dialogue na siyang naging dahilan upang mabilis nating maunawan ang bawat katagang kanilang ginagamit, bukud dito natutuwa rin ako sa magkahalong lengguahe na kanilang ginamit, ito ang Tagalog, Sinama (salita ng mga Tawi-Tawian at mga Badjao) at Sinug (salita ng mga Tausug) “take note: with matching subtitle pa”.

Nakatutuwang pakinggan na ang isang Bimbol Rocco ay magsasalita ng Sinama, at masasabi kong hindi matatawaran ang kanyang husay, at siyempre si Shelelha (Miss Nora Aunor) dito ipinakita ni Miss Nora Aunor kung bakit siya tinawag na Super Star, kasama rin sina Miss Lovi Poe at ang aking crush na si Miss Mercedez Cabral.

Dowry (Ungsud) – isa ito sa pinaka importanteng parte ng pagpapakasal, kung wala ka nito, hindi mo mapapakasalan ang iyong minamahal, ang laki at halaga ng Dowry ay ibinabatay ito sa antas ng pamumuhay ng pamilya ng babae, halimbawa sa eksena na kung saan ay namanhikan sina Shalelah at kanyang asawa na si Bangas-an (Bimbol Rocco), hiningan sila ng 200k dahil nakatapos daw ang kanilang kapatid sa pag-aaral, sa kultura kasi ng mga Muslim, dapat mong igalang at erespeto ang pagkatao ng babaeng mapapangasawa mo, dapat ikaw mismo (bilang mapapangasawa ng babaeng minahal mo) ang unang taong mag-aangat sa kanyang dangal, dapat pahalagahan mo ang kanilang pamilya, ang babae sa amin ay hindi ito parang prutas na pinipitas lang, hindi paninda na bibilhin mo lang, hindi ito bagay na babayaran mo lang, ito ay parang isang prensesa na dapat mong hanapan ng paraan para mapangasawa mo, at sa pamamagitan ng ungsud maipapakita mo sa pamilya ng babae na kaya mong buhayin ang anak nila.

Natutuwa rin akong mapanood ang kagandahan mismo ng Tawi-Tawi, dahil kung may Blue Lagoon ang Hollywood, meron naman tayong Green Lagoon, at kung merong Floating Market ang Thailand, meron rin tayong sariling bersyon nito sa Sitangkai Tawi-Tawi. Mapapanood rin natin dito ang sayaw ng mga muslim na kung tawagin ay Pangalay na sinasabayan ng tugtug gamit at gabbang o kulintang, at syempre maririnig natin ang orihinal na bersion ng kantang sumikat sa buong Pilipinas na Dayang-Dayang o maskilala sa title na Pakiring.

Thailand Floating Market

Sitangkai Floating Market

Marami akong nakitang pamilyar na mukha, tulad na lang ng lalakeng namagitan kela Shalelah at Bangas-an nang mamanhikan sila sa bahay nina Miss Lovi Poe, napanood ko rin ang anak ni Governor Sadikul Sahali na si Nurjay sahali, siya ang napangasawa ni Miss Mercedez Cabral sa Pelikula, natuwa ako nang makita ko silang sumayaw ng Pangalay, makikita niyo rin ang tradisyonal na dami ng mga muslim na kung tawagin ay Sablay at Batawi, ito ang suot ni Nurjay Sahali at Miss Mercedez Cabral ng sila’y ikasal sa pelikula.

Masarap panoorin ang pelikula, marahil kaya naging ganon ang aking pakiramdam ay dahil sa naranasan ko ang payak at simpleng pamumuhay dito, bagamat hindi kami orihinal na taga Tawi-Tawi, halos kalahati naman ng pamilya namin kung wala man sila sa Jolo Sulu ay nasa Tawi-Tawi ang mga ito, naging Election Officer din ang aking ama sa probinsyang ito ng mahigit sampung taon, at ako naman, naranasan kong magtrabaho sa Kapitulyo ng Tawi-Tawi sa pamumuno ni Governor Sadikul Sahali ng mahigit apat na taon, may labin-isang munisipyo ang Tawi-Tawi: namely Bongao (Main Capital), Panglimah Sugala, Simunul (where the oldest Mosque in the Philippines is located), Sitangkai ( the Seaweeds Capital of the Philippines), Sibutu (Formerly part of Sitangkai but separated early 2000), Mapun (Cagayan de Tawi-Tawi), Turtle Island (better known as Taganak to the native of Tawi-Tawi), Sapa-Sapa (Where my father used to be the Comelec Officer for more than 10 years before he retired), South Ubian, Tanduh Bas and Languyan. Sa loob ng labin-isang munisipalitidad, dalawa lang sa mga ito ang hindi ko napuntahan ito ay ang Turtle Island at Languyan.

Kaya naman masasabi kong may kakaibang excitement akong naramdaman ng mapanood ko ang pelikula at aaminin ko na sobra ko palang namiss ang lugar na ito, dahil kung gaano ka simple ang pamumuhay dito ganun din kasimple ang ang mga tao dito.

Para sa mga Tawi-Tawian

Salamat sa pagbabasa.

Glamorosa (Pinoy Screenplay)

Mukhang naging malumanay ang pagdalaw ko sa aking blog at sa blog ng may blog ng ibang blogger, ngunit hindi po iyon nangangahulugang tumigil na tayo sa pagsusulat at pagbabasa, sa katunayan, pansamantala kong iniwan ang pagsusulat at pagbabsa sa blog upang mabigyan ng mahaba-habang pagkakataon ang pagsusulat at pagbabasa, hmmm… gulo no?

May mga ibang bagay kasi akong inaaral ngayopn tungkol sa pagsusulat, alam niyo naman po, hindi po tayo magaling salarangang ito, kaya kailangan kong pagtuunan ng pansin ang ginagawa kong pagses-self studies dito, sa katunayan isa sa mga inaaral ko ngayon ay ang pagsulat ng script o screenplay.

Wala lang… makasulat lang at masabihang magaling… 

Isa po ito sa mga naisulat ko noon na ginawan ko nang script, alam ko pong maraming mali sa ginawa ko, pero pilit ko paring pinoste sa aking blog para may pang update lang ako, kasi kahit papaano ayaw ko itong mabulok at anayin.

Meron po akong free software na nadownload sa internet na ginagamit sa pagsulat ng pinoy script o screen play, ang kaso nga lang kapag nililipat ko na dito sa blog ko e nasisira na ang format nito. ehehehehe.

Sana po e maintindihan niyo na hindi po ako propesyonal at walang pormal na na ensayo at pagsasanay sa larangang ito, wala din akong maalalang araw nagkaroon kami ng ganitong subject noong nag-aaral pa ako, kung meron man marahil absent ako.

Nga pala naalala ko gumawa nga pala ako ng Term Paper tungkol sa Drama noong 4th years High school ako.

Kayo na po sana ang bahalang umintindi sa kwento ng ginawa ko, medyo magulo pero kung pagtyatyagaan niyong basahin, e maiitindihan namanniyo siguro, sana huwag niyo rin po akong husgahan bagkos e turuan na lang.

Yahoo….

----------------------------------------- Script Start Here -----------------------------------------

Glamorosa

By

Al Diwallay

Based on blog "Diana ang Glamorosa"

http://www.musingan.com/2012/01/diana-ang-glamorosa.html

This screenplay may not be

used or reproduced without the

express written permission of

the author.

Copyright©2012

Email: musingan@gmail.com

                                                    FADE IN.

INT. MANSION. ARAW.

Sa loob ng isang magarang na tahanan ng isang ekslusibong Subdivision, mauupo sa sofa si Diana (19), maganda, maputi, halatang may breeding, daig pa ang isang prinsesa sa pagiging glamorosa.

Bubuksan niya ang tv, di niya magugustuhan ang palabas,makalipas ang sampung sigundo, ililipat niya ang channel ng flat screen TV sa harap niya.

Maiinis dahil wala namang magandang palabas, kukuha ng isang stick ng isang kilalang blue seal cigarette na nakapatong sa lamesitang yari sa steel brush na nasa harap niya.

Hahanapin niya ang lighter, lilinga-linga siya, iisipin kung saan niya huling nailagay ang lighter, haharap ulit siya sa TV, makikita niyang nakapatong ang lighter sa TV Stand,tatayo siya para kunin ito, sisindihan niya ang sigarilyo saka niya ipapatong ulit ang lighter sa ibabaw ng TV Stand.

Maglalakad papunta sa pintuan ng terrace ng bahay, pagmamasdan niya ang paligid gamit ang isang napakatalim na tingin, gugumuhit sa kanyang pisngi ang isang mapangutyang ngiti, maaalala niya ang mga panahong nagdaan.

DIANA (V.O.)

Hindi ko na hahayaang babuyin niyo

ulit ang aking pagkatao.

Hihithitin niya ang sigarilyong hawak, saka ibubuga ang usok sa napakasakastikong pamamaraan, babalik siya sa sofa, mauupo, ipapatong sa ash tray ang sigarilyo na kanyang hawak, kukunin niya ang remote control ng tv na nasa tabi ng ash tray, ililipat ulit ang channel.

Sasandal sa sofa, ididikwatro ang paa, ililipat ulit ang channel, maiinis, bubuntong hininga saka iiling sabay pikit ng mata, pagkadilat ipapatong ang remote control sa ibabaw ng lamesitang nasa harap.

Tatayo at tutungo sa kusina.

CUT TO.

INT.KETCHEN.CONT

Kukuha siya ng pitcher sa fridge na may lamang orange juice, kukuha ng isang baso saka magsalin, ilalapag ang pitcher malapit sa lababo.

Dala ang isang baso ng orange juice, babalik ulit siya sa living-room.

CUT TO.

INT.LIVING ROOM.CONT

Hihigop muna siya ng orange juice saka niya ipapatong ang baso sa lamesitang nasa harap saka siya mauupo ulit sa sofa, Manonood ng palabas.

Ilang sandali pa, tutunog ang kanyang cellphone.

Dadamputin niya ang kanyang cellphone na nakapatong sa lamesitang nasa harap niya saka niya ito sasagutin.

DIANA.

(Sarkastiko)

Yes?

ANGELINA (O.S.)

(Excited)

Diana! Ikaw ba yan?

DIANA.

Yes! Speaking?

ANGELINA (O.S.)

Si Angelina ito, kamusta kana.

DIANA.

Angelina? who’s that?

ANGELINA (O.S.)

Angelina Perez, yung kababata mo,

ano ka ba, hindi mo na ako maaalala?

Matitigilan siya, hindi siya agad makakasagot.

ANGELINA (O.S.)

Uy! Diana andyan ka pa ba?

DIANA.

Wala akong kilalang Angelina.

(matigas niyang sagot sa kausap)

Huwag ka nang tumawag ulit.

ANGELINA (O.S.)

Ahh!!! Diana ano ka ba? si Angelina

ito, yung kababata mo.

Ibababa niya ang kanyang cellphone, hindi na hihintayin ang susunod pang sasabihin ng kanyang kausap.

Ipapatong niya ang kanyang cellphone sa lamesitang nasa harap saka niya kukunin ang kanyang sigarilyo, tatayo siya saka tutungo sa Terrace.

CUT TO.

EXT.TERRACE.CONT.

Mauupo siya sa upuan na nakalagay sa labas ng terrace,ipapatong niya sa ibabaw ng lamesitang nasa harap niya ang kanyang mga paa, isasandal ng bahagyan ang ulo, saka hihithitin ang sigarilyo.

DIANA (V.O.)

(Kalmado)

Papaano kaya niya nalaman ang

cellphone number ko? Ano ang

kailangan niya? bakit siya tumawag?

Hihithit ulit ng sigarilyo.

DIANA (V.O.)

Ah! basta, hindi na importante

yon, basta ang alam ko, kailangan

kong maging matigas, kailangan kong

maging pusong bato, dahil isa akong

glamorosa.

Hihithit ulit ng sigarilyo saka niya ito papatayin sa ash tray na nakalagay sa ibabaw ng lamesitang nasa kanyang harapan.

Tatayo, pupunta sa dulo ng terrace, pagmasdan ang paligid.

DIANA (V.O.)

Hinding-hindi ko na hahayaang

hamakin niyo ulit ang pagkatao ko,

hinding-hindi ko na ulit hahayaang

tratuhin niyo ako na parang aso.

     (Matalim ang mga tingin)

DIANA (V.O.)

(Titingin sa kanan bahagi

ng hardin)

Inalipusta niyo kaming magkakapatid,

pinandirihan.

DIANA (V.O.)

(Pipikit saka bubuntung hininga,

bubuksan ang mga mata sabay haharap)

Tinuring na parang hayop,pinagtawanan,

inalipusta, ngayon hinding-hindi ko na

kayo hahayaang gawin yun ulit sa akin, sa amin,lalabanan ko na kayo, dahil isa na akong glamorosa.

Lilingon, babalik ulit siya sa loob ng living room.

INT.LIVING ROOM.CONT

Maupo siya sa sofa saka manonood ulit ng palabas, pero halatang hindi nakatuon sa ppinapanood ang kanyang isipan.

DIANA (V.O.)

Alam kong darating ang araw na

titingalain niyo ako, at heto,

unti-unti ng nangyayari.

DIANA (V.O.)

(Ngingiti)

Unti-unti na akong umaangat,nakatira

na ako sa bahay na bato,hindi tulad

niyong, hindi parin nakakaalis sa putikan.

(Bubuntong hininga)

Dahil wala rin namang mapanood na maganda, isasara na niya ang telebisyon gamit ang remote control nito, uubusin and orange juice, tatayo at tutungo sa bathroom.

    CUT TO.

INT.BATHROOM.CONT

Pagmamasdan niya ng mabuti ang loob bathroom.

DIANA (V.O.)

Napakaganda.

DIANA

Alam kaya nilang ganito ang banyong

ginagamit ko dito.

DIANA (V.O.)

Marahil Hindi

(Sarkastikong ngiti)

Alam kong hindi.

Matutukso siyang maligo.

Isasara niya ang pinto, magtanggal ng damit, bubuksan ang

faucet ng shower. lulusub sa tubig saka maliligo.

Habang mag-isang nagpapakasasa sa marangya buhay sa loob ng

bathroom, biglang may kakatok sa pinto ng banyo.

MRS. CHUA (O.S.)

Diana, naliligo ka na naman ba,

sino ang tumawag kanina? parang

narinig kong tumunog ang cellphone?

DIANA

(Magugulat)

Ho! Mrs. Chua ay este Ma’am!!

Ahh... ahh... wala pu ma’am, di ko

po kilala ma’am.

MRS. CHUA (O.S.)

Ah! ano daw kailangan?

DIANA

(Magpupunas at halatang nagmamadali

para makalabas na ng banyo)

Wala po ma’am, nagkamali lang ng tawag.

MRS. CHUA (O.S.)

Ganun ba, tapos kana ba maglaba,

mukhang tumigil na ang ingay ng

washing machine sa likod ng kusina.

DIANA

(Magsasalita in a bisaya accent

and bisaya dialect)

Ayyy Oo, nakalimtan naku ang atung

washing machine.

DIANA

(tatawa)

Sige ma’am, humanun na naku ang

akong gilabhan.

MRS. CHUA (O.S.)

Hay naku, ikaw talaga, kung ano-ano

na namang kalokohan ang ginagawa mo

dyan, bilisan mo na, maglaba ka na,

ambisyosa.

DIANA

Dili ku ambisyosa ma’am, Glamurusa lang ku.

MRS. CHUA (O.S.)

Ay ambot.

DIANA

(Titingin sa camera)

Epic Fail.

(Ngingisi)

                                                  FADE OUT.

----------------------------------------- Script Ends Here -----------------------------------------

Naks pume-fade out na…

Hayst hirap palang  magself-study para gumawa ng Pinoy Script... anyway alam ko pong marami pa akong kakaining damo para matutunan ang tamang pagsusulat ng script. 

salamat sa pagbabasa