KM2: Akda

Tugon sa pakontest ni JKulisap.

Habang nagmumuni-muni ang aking kamalayang malaya sa lawak ng langit, ako’y napadpad sa nayon ng mga kulisap, nabasa ko dito ang isang panawagan para sa isang patimpalak, na inilathala ng isang magaling na manunulat na si JKulisap, isang Adhika na siyang pumukaw sa aking pansin at bumuhay sa aking nangangalumata nang mukha, nang mabasa ko’y agad akong namangha, malalim ang bawat hugot ng aking hininga sapagkat bawat salita na ginamit ay sadyang malatinhaga, payak lang ang mga alintutunin bagamat mapapansin na sa bawat salitang ginamit maaaninag na ito’y pinag-isipang mabuti kung papano mapagtatagpi-tagpi, katulad ng kuyukot na nakalagay sa ating likuran.

Napasandal ako at napa-isip, papaano ako lalahok sa kanyang patimpalak, kung ang kanilang istilo ay malayo sa aking nakasanayan, parang isang manananggal ang aking isip na lumabas sa loob ng isang banal na yungib, Ang pagsusulat ay parang isang pagsigaw ng malakas upang marinig ang bawat alingawngaw na dulot nito, ang manunulat naman ay parang isang bubuyog na lumilikha hindi lamang ng isang pulot-pukyutan kundi isang halinghing na kung papaano ang pagtangap mo at pagkakaintindi ay ganun din ang ganda at saysay nito.

Ang mga maharlika ng bayang sinilangan ay nagdiriwang sa sapagkat ito ay isang patimpalak na para lang sa mga katulad nilang magagaling at maraming alam, uti-unti kong nararamdaman ang isang di kanais-nais na damdamin, pawang hinagpis at panibugho ang nasa puso, hangad ko rin po sanang makilala sa larangan ng pagsusulat at pagiging makata, ngunit sadyang mailap sa akin ang katalinuhan na aking kailangan at muli naisip ko ako nga pala ay isang halimbawa ng lugami na pinipilit hanapan ang sarili ng puwang.

Ngunit ako’y nagpasya, ano nga ba ang mahalaga, ang magtagumpay at mapatuyan na ako’y may alam din, o ang makisalamuha sa mga taong higit na pinagpala at magbakasakaling may makapansin din sa akin, di ko man masyadong kilala ang may-akda ng Jkulisap kailangan kong lumahok upang ang peklat na dulot ng dikya ng takot ay mapalitan na ng luwalhati at kasiyahan.

Maraming salamat po sa inyong pagbabasa.